Hagstovan: Sølan í virði og umroknað til mongdir fyri smásølu er gjørd upp fyri fjórða ársfjórðing í fjør.

Sølan hjá feløgum í vinnugreinini ‘Smásøla úr handlum við blandaðum úrvali, har denturin er lagdur á mat-, drykkju- og tubbaksvørur’, er sølan hjá feløgum, ið vit kenna sum matvøruhandlar.

Í ársins prísum hækkaði sølan nærum 4% frá 4. ársfjórðingi 2022 til 4. ársfjórðing í fjør. Um vit draga prísvøksturin frá, so fáa vit virðið fyri umsettu mongdina t.e. mongdina av seldum vørum, kallað 'sølan máld í føstum prísum'. Sølan máld í føstum prísum hjá matvøruhandlum var nærum 2% lægri 4. ársfjórðing í fjør í mun til sama tíðarskeið árið fyri. Tað merkir, at hóast virðið á søluni hækkaði nakað, so er mongdin av seldum vørum minkað 2%.

Ymiskt hvussu sølan hjá handlum við húsarhaldsútgerð hevur hilnast
Verri hevur gingist ‘Serhandlum við jarnvørum, máling og glasi’, sum liggur undir flokkinum ‘Smásøla av húsarhaldsútgerð í serhandlum’. Sølan lækkaði hetta tíðarskeiðið stívliga 6%, og eftir at príshækkingar eru drignar frá, var mongdin av seldum vørum eisini 6% lægri enn árið fyri.

‘Serhandlar við elektriskum húsarhaldstólum’ er ein onnur vinnugrein undir flokkinum ‘Smásøla av húsarhaldsútgerð í serhandlum’. Her er sølan og mongdin av seldum vørum hækkað smá 5% frá 4. ársjórðingi í 2022 til 4. ársfjórðing í fjør.

Sølan av klæðum stendur í stað
‘Smásølan við klædnapløggum’ lækkaði 0,5% í virði hetta tíðarskeiðið, meðan selda mongdin stóð í stað í mun til árið fyri.

Sølan av fríðkanarvørum hækkað
Virðið á søluni hjá ‘smásøla við fríðkanarvørum og vørum til persónliga røkt’ hækkaði 10%, men tá prísvøksturin í tíðarskeiðnum er drigin frá, vísir tað seg, at mongdin av seldum vørum hækkaði stívliga 3%.