Tað prutlar av álvara undir lokinum við russiska markið, og nú vil Russland hava orð uppá, at hvørki Svøríki ella Finnland verða innlimað í Nato. Tað lyfti vil Nato kortini ikki geva, og tí er støðan í seinastuni blivin enn spentari enn hon hevur verið síðani Russland av álvara fór at flyta herfólk og -útgerð til ukrainska markið.
Svøríki hevur seinastu dagarnar sent hermenn til Gotland í Eystarasalti, men tað er ikki tí at landið beinleiðis stúrir fyri einum álopi, tað sigur Thomas Ängshammar frá eindini í svenska herinum sum hevur ábyrgd av Gotlandi.
- Vit síggja ein vaksandi áhuga og aktivitet í okkara nærumhvørvi, og tí noyðast vit at reagera, sigur hann við SVT.
Svøríki hevur í fleiri umførum jagstrað russiskar kavbátar í skergarðinum, seinast í 2014. Í 1981 rendi ein russiskur kavbátur á land við Karlskrona. Seinni kom fram, at hann hevði kjarnorkuvápn umborð.
Um tú veitst okkurt, sum VP ikki veit - skriva so til vp@vp.fo