Skaðin var ikki størri enn at strandfaraskipið Ternan kann fara beint aftur í sigling longu í morgin, eftir óhappið í Skopun í dag, har Ternan rendi á land og varð standandi til hon sjálv slapp av aftur tá tað fløddi.
Strandferðslan boðar frá á heimasíðuni, at Ternan byrjar aftur í sigling sambært ferðaætlanini í morgin.
Jóhan Petur Abrahamsen, rakstrarleiðari hjá SSL, upplýsir fyri VP, at tað vóru "menniskjalig mistøk" sum vóru orsøk til hendingina í Skopun í dag.
- Ein frágreiðing verður skrivað, og eg havi ikki hug at siga meira um tað beint nú, sigur hann.
Kavarar hava verið niðri og kanna skrokkin, tvær buglur eru komnar fremst á skipinum, men ongin leki er, og Skipaeftirlitið hevur givið loyvið til, at skipið kann halda fram í siglingini fyribils.
Um tú veitst okkurt, sum VP ikki veit - skriva so til vp@vp.fo
