Trý fólk eru dripin og fleiri onnur eru særd uttanfyri Notre-Dame kirkjuna í suðurfranska býnum Nice í morgun. Politiið váttar, at fólkini vórðu særd og dripin við knívi og í tí eina førinum varð høvdið høgt ella skorið av hjá eini kvinnu.
Eitt fólk er handtikið í samband við álopini.
Franska tjóðartingið er kallað saman til kreppufundar.
Hetta er triðjuferð í heyst, at ógvuslig álop henda á tilvildarlig fólk á opnari gøtu í Frankaríki.
Fleiri muslimsk lond, serliga Turkaland, hava boykottað Frankaríki, síðani franski forsetin, Emmanuel Macron, lovaði at avbyrgja víðgongdar islamistar, og forbjóða londum sum Saudi-Arabia og Turkalandi at senda sonevndar imamar til Frankaríki at prædika í fronskum moskum.
Um tú veitst okkurt, sum VP ikki veit - skriva so til vp@vp.fo
