Fleiri tekn og súmbol frá seinna heimsbardaga eru aftur at síggja í Týsklandi í hesum døgum.
Eitt nú ganga fleiri týskarar við gulu jødastjørnuni, men á stjørnuni stendur ikki 'jude' sum tað gjørdi undir seinna heimsbardaga. Nú stendur 'Ungeimpft' sum merkir 'ókoppsettur'.
Serligi ráðgevin hjá týsku stjørnini ímóti antisemitismu, Felix Klein, sigur við Tagesspiegel, at hann heldur, tað eigur at verða bannað at brúka jødastjørnuna á henda hátt.
- Tá fólk, sum vilja gera vart við sína misnøgdi við eitthvørt, brúka sonevndar jødastjørnur og harvið gera samanberingar við Holocaust, so eigur tað at verða bannað, sigur hann við avísina.
Myndugleikarnir í München í landslutinum Bayern hava tikið málið í egnar hendur, og hava longu bannað fólki at bera jødastjørnuna.
- Eg vóni bara, at aðrir landspartar gera tað sama, sigur Felix Klein.
Um tú veitst okkurt, sum VP ikki veit - skriva so til vp@vp.fo