Spenta støðan á markinum ímillum Russland og Ukraina gjørdist eitt vet spentari í gjár, tá amerikanskar fregnartænastukeldur lótu Nato vita, at eitt stórkríggj í Europa nú er komið enn eitt stig nærri.
- Vit eru í eini tíð nú, har ein russisk innrás kann byrja hvørja løtu, ella tá Putin forseti tekur avgerð um tað, ávaraði amerikanski uttanríkisráðharrin, Antony Blinken um í gjár.
Seinni tosaði hann í telefon við russiska starvsbróðirin, Sergej Lavrov, í eini roynd at sannføra russar um at halda fram við diplomatisku royndunum at finna eina loysn.
Eisini forsetarnir báðir, Joe Biden og Vladimir Putin tosaðu í yvir ein tíma í telefon. Tað sum partarnir báðir síðani hava fráboðað eftir telefonfundin er tó sera ymiskt.
Ímeðan Hvítu Húsini leggja dent á, hvørjar avleiðingarnar verða fyri Russland um ein innrás kemur í Ukraina, so tosar Kreml um, at hýsteríið hjá vesturheiminum hevur ongantíð verið størri enn nú. Ein russisk innrás er púra óhugsandi, sigur Russland, sum nú hevur yvir 130.000 hermenn standandi til reiðar við ukrainska markið.
Sambært New York Times hevur USA fingið fatur í upplýsingum sum benda á, at Russland ætlar at seta gongd á innrásina mikudagin. Um hetta er ein partur av tilætlaðu, sálarfrøðiligu herferðini frá russiskari síðu ber bert til at gita um.
President Biden spoke with President Vladimir Putin today to make clear that if Russia further invades Ukraine, the U.S. and our allies will impose swift and severe costs on Russia. President Biden urged President Putin to engage in de-escalation and diplomacy instead. pic.twitter.com/HqK0b65kFm
— The White House (@WhiteHouse) February 12, 2022
Um tú veitst okkurt, sum VP ikki veit - skriva so til vp@vp.fo