Líka inntil nú hava granskarar hildið, at upp til 50.000 ára gomul steinamboð, sum eru funnin í landnyrðingspartinum av Brasil, vórðu menniskjaskapt. 

Hesi amboðini vórðu hildin at vera millum tey fyrstu prógvini fyri menniskjum í Suðuramerika, men nú eru granskarar komnir fram til, at hetta helst er ein stór misskiljing. 

Og møguliga hava menniskju als ikki verið í økinum har í Norðureysturbrasil fyri 50.000 árum síðan.

Í eini grein í tíðarritinum Holocene, sum Artnet og videnskab.dk endurgeva úr, almannakunngera granskarar prógv, ið benda á, at capuchin-apur (Sapajus libidinosus) hava gjørt steinamboðini - og ikki menniskju sum fyrst hildið.

Steinamboðini eru funnin í sambandi við útgrevstur í Pedra Furada, eitt øki við 800 fornfrøðiligum toftum í Brasil. 

Granskararnir hava samanborið steinamboðini við tey, sum capuchin-apur í okkara tíð hava snikkað saman.

- Úrslitini vóru óvæntað. Tað var eingin munur millum tað, sum vit trúðu vóru menniskjaskapt amboð fyri 50.000 árum síðan, og so tað, sum apur hava gjørt í dag, sigur Agustín M. Agnolín, fornfrøðingur.

Eftirsum tað ikki eru onnur prógv fyri, at menniskju vóru í økinum fyri umleið 50.000 árum síðan, so eru granskararnir Agustín M. Agnolín og Federico L. Agnolín komnir til ta niðurstøðu, at tað eru apur, sum hava gjørt steinamboðini í omanfyrinevnda øki í Brasil.

Granskingin hjá teimum setir harvið spurnartekin við, hvørt menniskju, sum upprunaliga hildið, yvirhøvur vóru til staðar í hesum økinum í landnyrðingspartinum av Brasil fyri okkurt um 50.000 árum síðan. 

Augustin M. Agnolín er granskari á National Institute of Anthropology and Latin American Thought, meðan Federico L. Agnolín er steinrenningarfrøðingur á Azara Natural History Foundation. 

Teir hava báðir tilknýti til Argentina's National Scientific and Technical Research Council (CONICET).