Ein av teimum allargløggastu vinum av Føroyum slóknaði mikudagin tann 2. august, sum  92 ára gamal.

Erik var føddur í Føroyum í 1925, har pápi hansara arbeiddi sum stjóri í Føroya banka.

- Hóast bæði foreldrini vóru donsk, tók hann væl við føroyskari mentan og máli.

Hann flytti til Danmarkar í 1945 og fór at lesa jura við universitetið í Kjøpinhavn, har hann hevði javnligt samband við fleiri føroyskar lesandi.

Hann arbeiddi fyrst sum advokatur og síðani eina tíð í Værløse sum undirvísari í Flogvápninum, men seinni flytti hann til Ålborgar.

Hann var ein sera vitugur maður, dugdi væl føroyskt og luttók rættiliga ofta í debattini um føroysk viðurskifti, ikki minst aftaná ta stóru kreppuna í 1990´unum.

Tað eru ikki nógv ár síðani, at hann skrivaði greinir og kronikkar við rættiliga hvøssum og skilagóðum analysum av tí føroysku fíggjarstøðuni.

Hann búði í Ålborg, har hann fekk sítt lívsstarv sum undirvísari í samfelagsjura.

Hann var eisini bankamaður eitt skifti, men best dámdi honum kortini at undirvísa.

Hann var trúgvur limur av Føroyingafelagnum í Ålborg.

Hann bleiv valdur inn í býráðið í býnum sum javnaðarmaður, men hann bleiv so óklárur við tann lgendariska   borgmeistaran Marius, at hann gjørdist uttanflokksmaður í býráð num ein stóran part av setuni.

Líka til síni síðstu ár var hann aktivur, alment hugaður og væl orienteraður um aktuell mál.

Føroyar høvdu alsamt hansara stóra áhuga - hann var jú eisini næstan "føroyingur" tey fyrstu tjúgu árini av sínari ævi.

Friður verið við hansara minni.

Virgar T. Dalsgaard