Nú mikukvøldið 27. september kl. 19.30 verður fyrsta Miðvikan í Hoyvíkar kirkju í heyst. Tá er evnið mæta íslendska sálmaskaldið Hallgrímur Pétursson, sum er víða kendur.
Tað er Petur Jacob Sigvardsen, heiðursdoktari, sum fer at greiða frá uppvøkstri hansara, lívssøgu og sálmaskaldskapinum.
Hallgrímur Pétursson, sum livdi frá 1614 til 1674, er ógviliga høgt í metum í Íslandi. Tann stóra og kenda Hallgrimskirkjan í Reykjavík er uppkallað eftir sálmaskaldinum, sum virkaði sum prestur á Vestfirðum. Kirkjan í Saurbær á Hvalfjørðinum eitur eisini Hallgrimskirkjan.
Ein týðandi partur av sálmaskaldskapi hansara eru teir kendu passiusálmarnir, sum á ein nemandi hátt lýsa líðingarsøgu Krists.
Miðvikan í Hoyvíkar kirkju er sum sagt nú mikukvøldið kl. 19.30. Aftaná er ein kaffimunnur at fáa.
Um tú veitst okkurt, sum VP ikki veit - skriva so til vp@vp.fo
