Livandi mentan og gleimur í havnargøtum. Fríggjakvøldið 2. juni verður av álvara lív í miðbýnum, tá ið Havnin bjóðar øllum vælkomnum á Mentanarnátt 2017.
Síðani hon varð hildin fyrstu ferð í 2001, er Mentanarnáttin vorðin eitt fast afturvendandi tiltak í Havnini, og skráin og undirtøkan veksur hvørt ár.
Skráin er drúgv og fjølbroytt Mentanarnáttina. Tónleikatiltøk eru ymsastaðni í býnum, og stovnar og fyritøkur hava opið hús. Handlar í býnum hava opið til klokkan 23.00, og allar matstovur hava eisini opið.
Nýtt á skránni er millum annað bamsuskaðastova á Landssjúkrahúsinum. Smæran í Vørðsluni hevur eisini opið hús við tónleiki, framløgum, hugleiðingum og øðrum. Í Niels Finsens gøtu verður stór mótasýning, og Handilsgøtan spennir seg út við barnatiltaki, tónleiki og undirhaldi.
Øll skráin fyri Mentanarnáttina kann lesast á visittorshavn.fo og facebook.com/mentanarnáttin
Skráin sæst eisini HER.
Um tú veitst okkurt, sum VP ikki veit - skriva so til vp@vp.fo
