Tað er lagt upp til tann heilt stóra tunnuslátturin í ár millum borgarstjórar.

Tunnan er væl bjálvað, tí í henni liggur fullur posi við 15 milliónum krónum, sum skulu brúkast til royndarætlan við heilsudepli. Ein sokallaður økis-kattur.

Ein borgarstjóri hevur boðað frá, at hann verður ikki við í kappingini, tí mótstøðan móti hesi ætlan í sínum øki er ov stór. Borgarstjórin sigur seg vera sannførdan um, at allir partar høvdu sæð stóra virðið í ætlanini, men hansara handfaring av málinum hevur ikki verið nóg góð, tí meldar hann pass og verður eygleiðari í kappingini.

Veddingarfyritøkurnar eru farnar at meta um, hvør favorittur er til hesa fittliga stóru peningaupphædd, og har liggur borgarstjórin í Runavíkar kommunu klárt nummar eitt at gerast kattakongur.

Veddingarfyritøkurnar meta eisini at borgarstjórin á Tvøroyri og borgarstjórin í Vestmanna kunnu fara og gera seg galdandi.

Ad-hoc toymið vónar inniliga, at borgarstjórarnir fara at sláa tunnu og ikki hvør annan!

Ad-hoc toymið