Kanningarstjórin Ken Nónklett metir at Jacob Vestergaard skal fáa eina átalu.
Kanningin er drúgv - einar 200 síður - men hon verður teldutøk seinni.
Ken Nónklett var í Útvarpinum klokkan 14:
Kanningarstjórin var spurdur, hví hann heldur Jacob Vestergaard skal fáa eina átalu, og svarar hann soleiðis:
- Eg meti at Jacob Vestergaard hevur tilvitað framt brot á góðan fyrisitingarsið og tað er í sambandi við útlutanirnar í 2020 av kvotum til vinniligar verkætlanir.
- Tað var klárt at taka avgerðir í tí málinum, men hann velur ikki at luta út tí at tað tilmælið hann fær er ikki ordiliga tað hann sær fyri sær.
- Umsitingin ávarar - tú hevur skyldu at luta út, tú heldur ikki góðan fyrisitingarsið, so velur hann allíkavæl at lata vera við at viðgera umsóknirnar.
- So sjálvt um lógin verður broytt og kvoturnar verða fluttar um ár, so meti eg stadigvæk at hann fremur brot á góðan fyrisitingarsið.
Viðvíkjandi spurninginum um, hví tað ikki er revsivert, svarar kanningarstjórin:
- Eg meti at hann fremur eitt brot, men eg meti bara ikki at grundarlag er fyri at reisa eitt revsimál. Tað er ikki beinleiðis brot á sjófeingislógina ella á fyrisitingarlógina.
- Tá ið hann velur ikki at taka nakra avgerð, so er tað ikki í heimildarloysi, segði kanningarstjórin.
Um tú veitst okkurt, sum VP ikki veit - skriva so til vp@vp.fo