Kósin í Klaksvík seldi fyri stívliga 251 milliónir krónur í fjør. Tað er væl betri enn í 2018, tá sølan var góðar 218 mió kr og eitt kvink størri enn 2017, tá selt bleiv fyri 249 mió kr.

Hóast sølan setti met, og úrslitið uppá smáar 4 mió kr eisini var gott, so hevur tað mangan verið betri, eitt nú í 2015 tá 8 mió kr lógu eftir og í 2011 tá 9,6 mió kr lógu eftir.

Kósin eigur í øðrum fyritøkum, og úrslitið av kapitalpørtum hagani sæst eisini væl og virðiliga aftur. Í fjør var úrslitið av kapitalpørtunum 5,5 mió kr, og var sostatt orsøk til positiva úrslitið fyri árið hjá Kósini. Sama var í 2018, tá úrslitið uttan kapitalpartar hevði verið hall uppá áleið 4 mió kr. Dóttirfeløg hjá Kósini eru eitt nú Eystfelli, Klakkur, Grønanes og Northern Fish Cold Storage.

Fíggjarstøðan javnvigar við 184 mió kr og áleið helvtin, ella 90 mió kr, er eginogn.

Leiðslan væntar betri úrslit í 2020, og tað er umbygging og nútímansgerðini av virkinum fyri at takka. Virkið er nú framtíðartryggjað, sigur leiðslan í frágreiðingini. Hon er hampuliga væl nøgd við úrslitið fyri 2019, sigur hon.