Tórshavnar kommuna: Blái Krossur tók í dag nýggju hølini í Niels Finsensgøtu í nýtslu – “loyniliga” kjallaran í nummar 16.
Borgarstjórin, sum vitjaði inn á gólvið, segði, at Blái Krossur fyri honum var ein púra nátúrligur partur av býnum.
- Blái Krossur eigur at vera her – og vit kunnu valla verða tykkara virksemi fyriuttan, segði borgarstjórin
Upprunin til Bláa Kross liggur heilt afturi í 1877, t.v.s. fyri skjótt hálvtannaðhundrað árum síðan.
Tað byrjaði sum eitt hjálpararbeiði fyri fólk, ið vóru bundin av rúsdrekka, og í dag hevur hetta arbeiðið breitt seg til eini hálvthundrað lond.
Í Føroyum hava vit kent Bláa Kross í skjótt 120 ár sum ein felagsskap, sum trúfast hevur borið boðskapin um umsorgan fyri hvørjum øðrum, og um fráhald frá rúsdrekka og rúsevnum.
- Og í dag er stuttligt at síggja, at hetta arbeiði heldur fram og at tit økja og betra um umstøður og virki tykkara.
- Og eisini eitt sindur stuttligt nú at finna tykkum í einum gomlum dansikjallara – sum eisini var fyrsta staðið, ið seldi pitsa í Føroyum.
- Men eg veit, at tit leingi hava leitað eftir hølum, tí tit høvdu tørv á meira plássi.
- Og fyri fýra árum síðan fingu tit so høvið at keypa henda bygningin, sum kundi hýsa einum stórum parti av tykkara arbeiði í Havn.
- Og eg má siga, at her er komið væl burturúr – tí her sá milt sagt ikki pent út, tá tit yvirtóku bygningin.
- Og gott er at síggja, at tit fáa gagnnýtt allar hæddirnar til tykkara fjølbroytta virksemi innan endurnýtslu og sokallaða nýnýtslu, til handilin og til fyribyrgjandi arbeiði.
- Eg skilji á Dakko (Petersen), at hesi nýggju hølini fara at skapa fantastiskar møguleikar fyri ungdómsverkætlan tykkara, ið kallast Liv Lívið.
- Henda verkætlan hevur sum kunnugt til endamáls at fyribyrgja, at ung koma illa fyri og gerast bundin av rúsdrekka og rúsevnum annars.
- Mann hevur jú lagt til merkis seinastu árini, at tit eru til steðar á festivalum og øðrum stórum tiltøkum, har tit altíð hava havt eitt rúsfrít øki at bjóða ungum. Og tað fegnast vit øll um.
- Í Kongagøtu hava tit so tilboð til foreldur við rústrupulleikum og familjum teirra, og aftanfyri í Lucas Debesargøtu er so ungdómsviðgerðin til tey millum 15 og 25.
- Sostatt hava tit nógv virksemi mitt í býnum. Tykkara stóra arbeiði er sjónligt, eitt arbeiði, sum vit hava størstu virðing fyri og eftir besta førimuni stuðla.
- Eg fari at takka tykkum fyri tykkara stóra fyribyrgjandi arbeiði í okkara høvuðsstaði, ynskja tykkum hjartaliga tillukku við húsunum og hølunum, og ynskja tykkum at tað besta í tí komandi, segði Heðin Mortensen, borgarstjóri, í stuttari røðu.
Um tú veitst okkurt, sum VP ikki veit - skriva so til vp@vp.fo