FSF: – Vit mugu bara ásanna, at vit møttu sera sterkari mótstøðu, og samanumtikið, so megnaðu vit ikki nógv ímóti teimum. Men hetta hevur allíkavæl verið ein stór uppliving. Genturnar hava arbeitt hart og verið ótrúliga raskar, samstundis sum tær heilt sikkurt hava fingið nógvan lærdóm heim við.

Soleiðis sigur Eyðvør Jakobsen, ið stendur á odda fyri U17-landsliðnum við gentum, sum hevur verið til NM kapping í Sundsvall í Svøríki.

Okkara gentur spældu tríggjar dystir, og talan gjørdist tíverri um tríggjar greiðar ósigrar. Mótstøðulondini vóru England, Finnland og Dannmark. Í fyrsta dystinum taptu tær 4-0 fyri Englandi, síðani vóru finsku genturnar náðileysar og vunnu 10-0, meðan triði og seinasti dysturin endaði 7-0 til Danmark.

– Ímóti Englandi spældu vit ein góðan dyst; genturnar kempaðu og stríddust væl, og hildu nærum allar avtalur. Men ímóti Finnlandi og Danmark megnaðu vit ikki at halda mótstøðuliðunum líka væl burtur frá málinum, sigur Eyðvør Jakobsen við heimasíðuna hjá FSF.

Næst á skránni hjá U17 gentunum er EM-undankappingin, sum verður í Albania um mánaðarskifti november-desember. Tá vera mótstøðulondini Albania, Wales og Kasakstan.