Grundgevingin hjá fiskiráðharranum at loyva øllum at bjóða á uppboðssølunum var, at vit fóru at fáa ein betri prís.

Og tað fingu vit eisini á seinastu uppboðssølunum millum annað, men nú er tað heldur ikki gott nokk.

Nú gjørdist prísurin brádliga ov góður, og tí er ætlanin, at teir sum hava eginkvotu ikki skulu sleppa at bjóða á komandi uppboðssølum.

Norður- og Eysturøki skulu veljast frá.

Tað vil siga at bara nýggir aktørar skulu sleppa á uppboðssøluna, og úrslitið verður tá, at vit fara at fáa ein verri prís, sum so gevur minni í landskassan.

Og helst er ætlanin eisini, at uppboðssølurnar sum skuldu vera í 2019, nú verða framskundaðar til seinni í heyst 2018.

Higartil er alt sum var fráboðað frammanundan gingið galið, og eisini seinastu uppboðssølurnar, hóast ávaringar um júst tað, at sterku feløgini fóru at bjóða.

Ruðuleikin á fiskivinnuøkinum og viðvíkjandi uppboðssølunum ikki minst boðar frá, at vit hava ein fiskiráðharra sum í løtuni tykist ráðaleysur og vísur seg eisini at hava mist tamarhald á støðuni.

Hevur fiskiráðharrin fingið ringa samvitsku, kundu vit spurt.