Fiskimálaráðið fekk 10 umsóknir til tey 7.800 tonsini av svartkjafti sum vórðu sett av til vinnuligar fiskiroyndir. Tilsamans varð søkt um 26.700 tons.
Fimm umsóknir vórðu játtaðar í samráð við Havstovuna.
Tríggir umsøkjarar fingu hvør 2.000 tons, ein fekk 800 tons og ein fekk 1.000 tons.
Fiskimálaráðið skrivar á heimasíðuni, at eins og í fjør í sambandi við tilsøgnir um Vinnuligar Fiskiroyndir eftir svartkjafti, makreli og norðhavssild, verður roynt at seta nakrar serligar treytir í játtanartilsøgnirnar, sum tryggja, at tað verður gjørt, sum ætlanin er við royndunum.
- Aftur í ár er dentur lagdur á at fáa lýst massabalansurnar í verkætlanini so væl sum gjørligt. Frágreiðingar skulu sendast Fiskimálaráðnum, tá royndirnar eru gjørdar, í seinasta lagi 31. desember 2021.
Kvotur og kvotapartar, sum ikki eru nýttir í ár, fella aftur til Fiskimálaráðið 31. desember 2021, sostatt kunnu kvotur og kvotapartar ikki leingjast inn í komandi ár.
Um tú veitst okkurt, sum VP ikki veit - skriva so til vp@vp.fo
