Síðani russisku innrásina í Ukraina fyri einum góðum ári síðani eru russarar floymdir til støð sum Bali, tí har er lætt at sleppa at vera. Teir vilja ikki vera í Russlandi, tí so er vandi fyri, at teir verða innkallaðir til kríggið.
Talið á russarum á Bali er so nógv vaksið seinasta árið, at teir nú eru næststørsti tjóðskapur sum ferðast til oynna, eftir als ikki at vera á listanum yvir topp fimm áðrenn kríggið.
Og tað eru tey sum búgva á Bali nú troytt av, tí nógvir teirra duga ikki fólkaskikk, skrivar almenna australska kringvarpið, ABC.
Tey ganga full, nakin, skriva á húsaveggirnar, arbeiða illegalt og vísa vanvirðing fyri støðum sum hava serligan andaligan týdning fyri lokalu fólkini, verður sagt.
Á myndini er ein russiskur sonevndur influensari, Luiza Kosykh, avmyndað hálvnakin á einum 700 ára gomlum træi, sum fyri íbúgvarnar á Bali er heilagt. Hon skal nú vísast av oynni fyri ólátaðan atburð, og er russari nummar 59 sum fær durafjórðingin av somu orsøk higartil í ár.
Um tú veitst okkurt, sum VP ikki veit - skriva so til vp@vp.fo
