- Eg komi úr einum heimi við nógvum tónleiki, staðfestir Eva Berghamar, oddakvinna í danska indie-poppbólkinum Kayak, sum er í holt við at leggja Danmark fyri sínar føtur, skrivar KVF.
Berghamar-eftirnavnið lýgur ikki.
26 ára gamla Eva Berghamar, sum er oddakvinna í danska poppbólkinum Kayak, er úr góðum føroyskum bergi brotin.
Abbi Evu er hin navnframi Øssur Berghamar, ið flestir føroyingar kenna frá hansara virksemi í Kristnastovu á Amager, meðan pápi hennara er Andrew Berghamar, sum prestur í Skovlund fríkirkjuni í Ballerup. Báðir eru teir kend nøvn innan Brøðrasamkomuna í Føroyum.
"Bæði foreldrini hjá mær eru hálvir føroyingar, so samanlagt eri eg eisini hálvur føroyingur," greiðir Eva læandi frá, tá hon er gestur í LEITISSTEIN í útvarpinum í morgin, fríggjadagin, klokkan eitt.
Um tú veitst okkurt, sum VP ikki veit - skriva so til vp@vp.fo
