Vladimir Putin og Alexander Lukashenko hava gjørt avtalu um at Russland skal seta upp taktisk kjarnorkuvápn í Hvítarusslandi í seinasta lagi 1. juli.
Tað skrivar russiska tíðindastovan Tass.
At kjarnorkuvápn eru taktisk merkir, at tey ikki hava so sterkar løðingar sum tey strategisku kjarnorkuvápnini.
Londini bæði hava leingi havt tætt samstarv á hernaðarøkinum. Eitt nú hevur Russland longu frammanundan 10 flogfør sum kunnu hava kjarnorkuvápn umborð standandi í Hvítarusslandi.
Fáar dagar eftir russisku innrásina í Ukraina í februar í fjør høvdu tey í Hvítarusslandi eina fólkaatkvøðu um at broyta grundlógina, so kjarnorkuvápn aftur kundu vera í landinum. ES og onnur hava sagt, at umfatandi valsvik var framt á fólkaatkvøðuni, sum tí ikki er eftirfarandi.
Um tú veitst okkurt, sum VP ikki veit - skriva so til vp@vp.fo