Fyrr trýtur streymur í á, enn kvinnu trýtur ráð
- Føroyskt orðatak

Rules

Only words with 2 or more characters are accepted
Max 200 chars total
Space is used to split words, "" can be used to search for a whole string (not indexed search then)
AND, OR and NOT are prefix words, overruling the default operator
+/|/- equals AND, OR and NOT as operators.
All search words are converted to lowercase.

Lesarin skrivar

Fyrrverandi landsverkstjórin Mikkjal Helmsdal var ein skilamaður. Tá norðmenn um 1980 fóru at gera undirsjóvartunlar bað hann Heina Olsen um at tekna undirsjóvartunlar til allar oyggjar í Føroyum. Hansara meting var, at hetta var ein góð íløga, tí raksturin av øðrum flutningsloysnum er alt ov dýrur og veitir ikki nóg góða tænastu.

Hendan meting er røtt, sum okkara royndir hava víst.

Tíverri hava vit ikki í nóg stóran mun fylgt ráðum Mikkjals.

Tá vit settu okkum fyri at gera tunnilin til Sandoynna lupu vit Hestoynna um. Tí røkta vit farleiðina við hesa oyggj á annan hátt, sum er dýrur og vánaligur.

Nú skal suðurleiðin gerast. Eftir tí Dimmalætting visti at siga 1. september 2023 er alt greitt til at gera ein 22 kilometra langan tunnil av Skarvanesi til Sandvíkar. Ongar tekniskar forðingar eru fyri hesum.

Men er tað klókt?

Onga staðni í heiminum er nakar undirsjóvartunnil longri enn 12 kilometrar gjørdur. Tað er við atliti til trygdina.

Er nakar alternativur møguleiki fyri suðurleiðina?

Tað er komið fram, at tað er tekniskt møguligt at gera eina byrging millum Skarvanes og Skúvoy og haðani ein átta kilometra tunnil til Stóru Dímun og haðani ein ellivu kilometra tunnil til Sandvíkar. Hesir báðir tunlarnir eru tilsamans tríggjar kilometrar stytri enn uppskotið í Dimmu 1. september. Grótið kann nýtast til byrgingina. Arbeiðið kann gerast skjótari enn við at gera ein tunnil, tí her ber til at byrja í fýra arbeiðsplássum í senn í staðín fyri í tveimum, og einki forðar eini samtøku av føroyskum byggifyritøkum at avgreiða hesar smærri verkætlanirnar.

Størsti fyrimunurin við hesi loysn er tíðin. Minkar hon frá átta árum niður í helvt, spara vit útreiðslurnar av verandi farleið í fýra ár. Her er talan um tvær hundrað spardar milliónir um árið. Men tann stóra sparingin kemur tá suðurleiðin er liðug. Raksturin av henni verður bert ein brotpartur av tí sum verandi farleið kostar, og munurin í tænastustøðinum verður sum á degi og nátt. Heilt ræðandi er, at hveppa vit okkum so nógv við at koma í gongd, at vit noyðast at fáa nýtt skip fyri Smyril, verður kostnaðurin av hesum fari meir enn ein milliard.

Serliga stórur verður vinningurin av at vit sleppa frá at røkja skipa- og tyrlusambandið við Skúvoy og Dímun, sum frá at vera útoyggjar koma at vera mitt í verðini.

Hví velja skeivar íløgur tá vit kunnu fáa so nógvan vinning av at velja við skili?

Zakarias Wang

Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.

Um tú veitst okkurt, sum VP ikki veit - skriva so til vp@vp.fo