Sjúkt er samfelag, har tað loysir seg best einki at eiga og einki at tíma
- úr Børkuvísum

Rules

Only words with 2 or more characters are accepted
Max 200 chars total
Space is used to split words, "" can be used to search for a whole string (not indexed search then)
AND, OR and NOT are prefix words, overruling the default operator
+/|/- equals AND, OR and NOT as operators.
All search words are converted to lowercase.

Vinna

J&K Petersen hevur staðfest yvirskot á rakstrinum fyrra hálvár 2023, eftir at 2022 og 2021 vóru tvey tung ár hjá byggifyritøkuni. Nevnd og stjórn vænta nøktandi avlop í ár.

- Vit eru sera fegin um, at vit kunnu staðfesta, at royndirnar at venda neiligu gongdini hjá J&K Petersen seinastu tvey árini hava borið ávøkst. Tað sigur Christian Andreasen, nevndarformaður, tá hann stutt tekur saman um virksemið hjá byggifyritøkuni árini 2021, 2022 og fyrra hálvár 2023.

Roknskapurin hjá J&K Petersen vísti hall á 32 milliónir krónur eftir skatt í 2022, eftir at felagið eisini hevði havt undirskot í 2021. Byggifyritøkan hevur sostatt lagt tvey tung ár aftur um seg, og nú sær bjartari út. Grannskoðaði hálvársroknskapurin fyrra hálvár 2023 vísir 5,4 milliónir krónur í avlopi fyri skatt. Nevnd og stjórn vænta, at J&K Petersen fer at hava eitt nøktandi avlop í 2023.

Í fjør heyst avgjørdi aðalfundurin at víðka nevndina í felagnum, og síðani tá hevur nevndin – saman við
dagligu leiðsluni og eigarunum – arbeitt miðvíst við at venda neiligu gongdini. Nevndin hevur framt
broytingar í dagligu leiðsluni, og innanhýsis bygnaðarbroytingar eru eisini farnar fram.

Nýggja nevndin setti í fjør Sigtór A. Petersen sum stjóra í felagnum. Varastjóri er Anna Kalsø, og Jákup Mørk er fíggjarleiðari. Eigararnir hava eisini skotið nýggjan partapening inn í felagið, og samlaða eginognin er góðar 40 milliónir krónur í grannskoðaða roknskapinum fyrra hálvár í ár.

J&K Petersen hevur í tøttum samstarvi við sín peningastovn lagt langfreistaðu skuldina um, og nýggir byggisáttmálar eru gjørdir. Felagið hevur sostatt ein nøktandi umsetning og eitt nøktandi rakstrargrundarlag.

- Gongdin er vend, stóru verkætlanirnar koyra eftir ætlan, og ordrabókin komandi tíðina er nærum full. Vit eru tískil sera fegin um, at J&K Petersen við sínum mongu dugnaligu starvsfólkum framhaldandi er ein virkin og kappingarførur aktørur á føroyska byggimarknaðinum, staðfestir Christian Andreasen, nevndarformaður.

Christian Andreasen vísir á, at eigarar, leiðsla og starvsfólk vóru sera trúføst, tá felagið kom í tungan búskaparligan andróður, og at viðskiftafólk eisini hava víst stóra vælvild í sambandi við umskipanina av felagnum.

- Øll hesi viðurskifti hava verið við til at fáa felagið aftur á rætta kós. Vit eru takksom fyri, at vit kunnu boða frá, at gongdin er vend, og at J&K Petersen aftur hevur positiv tøl á botnlinjuni, sigur nevndarformaðurin.

Umframt Christian Andreasen sita Klaus Rasmussen, grannskoðari, Jóannes Niclasen, byggikønur, og Ragnhild A. Petersen, í nevndini.

Um tú veitst okkurt, sum VP ikki veit - skriva so til vp@vp.fo