Tann serligi føroyski laksurin, sum Hiddenfjord ætlar at ala til stóra kinesiska marknaðin, fer at hava serliga tvey eyðkenni frá vanliga laksinum, sum alifyritøkan Hiddenfjord er kend fyri: Tey eru stødd og litur.
Stjórin í Hiddenfjord, Atli Gregersen, vil ikki avdúka neyvari um stødd og lit nú, men sigur, at arbeitt hevur verið við ymiskum loysnum, sum eru ætlaðar serligum marknaðum, og tann stóri kinesiski marknaðurin er avgjørt ein teirra.
- Vit hava arbeitt við tí í longri tíð, at fáa ein serligan føroyskan laks til eitt nú kinesiska marknaðin, og økt ferð er komin á arbeiðið, eftir at vit fingu kinesisk-føroysku orðabókina, tí síðani tá er eftirspurningurin vaksin munandi, sigur Atli Gregersen.
Spurdur, nær laksurin er klárur til marknaðin og hvussu hann skal flytast til eitt nú Kina, sigur stjórin, at laksurin er so at siga klárur, men bíðað verður eftir at finna eina flutningsleið úr Europa til Kina.
Um tú veitst okkurt, sum VP ikki veit - skriva so til vp@vp.fo
