Kann tað hugsast, at ársúrslitið hjá Meginfelag Búnaðarmanna er eitt barometur fyri, hvat fleiri føroyskar fyritøkur hava í væntu komandi árini, í øllum førum so leingi sum rávøruprísirnir eru so høgir?

Hóast nettosølan vaks munandi, úr 164 milliónum krónum fyrraárið til 171 milliónir krónur í fjør, sum er met, so tódnaði ársúrslitið niður í ein triðing í mun til árið fyri. Ársúrslitið var 3,3 mió kr í 2020 men bert 1,1 mió kr í fjør.

Lønirnar vuksu við áleið 1,4 mió kr, so tað gjørdi sítt, men stóri vøksturin var at síggja í framleiðslukostnaðinum, sum vaks við smáum 8 mió kr og endaði á 116,7 mió kr.

Leiðslan sigur í frágreiðingini, at hon er nøgd við úrslitið, havandi í huga fortreytirnar.

- Vit vistu longu frá ársbyrjan, at t.d. fóðurprísurin á bulk fór at hækka munandi, men valdu at halda sama lága prísin alt árið. Hetta kostaði MBM umleið 2 mió kr, stendur í frágreiðingini.

Fíggjarstøðan hjá MBM javnvigaði við 105 mió kr og eginognin var stívliga 36 mió kr.

Hákun Steingrímsson er stjóri.