Elsebeth Mercedis Gunnleygsdóttur, landsstýriskvinna í almannamálum, hevur raðfest, at vit í Føroyum fáa sett gongd á arbeiðið, at skipa eitt móttøkuhús fyri harðskapsrakt. Hetta sæst í uppskoti til fíggjarlóg 2022, sum er løgd fram.
Í vár vórðu úrslit frá nýggjari harðskapskanning frá 2020 løgd fram. Har varð staðfest, at tá tað kemur til likamligan, kynsligan og sálarligan harðskap, eru Føroyar onki undantak – støðan í Føroyum er eins ring, sum í okkara grannalondum.
Landsstýriskvinnan undirstrikaði til framløguna, at eingin í Føroyum skal vera fyri harðskapi ella ágangi.
- Vit skulu krevja eina null-hugsjón, tá um harðskap og kynsligan ágang ræður, segði landsstýriskvinnan.
Og ein týðandi partur í hesum arbeiði verður júst, at fáa sett á stovn eitt móttøkuhús fyri harðskapsrakt.
Dømi um líknandi móttøkuhús eru at finna í okkara grannalondum.
Hesi veita møguleikan fyri breiðari vegleiðing til tey, sum eru fyri harðskapi, alt savnað á einum staði.
Talan er tá um eitt nú løgreglu, sosialráðgeving, sálarfrøðiliga hjálp og sjálvhjálparbólkar.
Við hesi játtan uppá 300.000 krónur, er nú møguligt at fara undir fyrireikingarnar, longu í komandi ári.
Mett verður, at eitt móttøkuhús kann byrja sítt virksemi í endanum av 2022.
Um tú veitst okkurt, sum VP ikki veit - skriva so til vp@vp.fo