Russiski forsetin Vladimir Putin slær fast, at tann serliga hernaðarliga atgerðin í Ukraina kemur at halda fram, til málini eru rokkin.
Putin ásannaði í eini røðu í dag, at herbúgvingin av fleiri soldátum til kríggið móti Ukraina hevur rent seg í serligar trupulleikar.
Hann lovaði tó hernaðarligu leiðarunum, sum lýddu á, fullan stuðul.
- Russiski herurin skal fáa alt, sum hann biður um, segði forsetin.
Putin helt eisini fyri, at Russland kemur at halda fram við at styrkja um atomtilbúgvingina.
Hetta skrivar nrk.no.
Kríggið í Ukraina byrjaði tann 24. februar í ár, tá ið Russland gjørdi innrás í landið.
Sambært ST hava næstan 7.000 sivilfólk latið lív undir krígnum og uppaftur fleiri soldátar, bæði ukrainskir og russiskir.
Longu í november metti amerikanski herovastin Mark Milley sambært BBC, at okkurt um 200.000 soldátar hava latið lív av krígnum - umleið 100.000 ukrainar og 100.000 russar.
Um tú veitst okkurt, sum VP ikki veit - skriva so til vp@vp.fo
