Í dag verður fyrsta felags norðurlendska kanningin, sum ásetur virðið av bruttoinntøkunum frá sølu av rættindum vegna høvundar í 2024 í Danmark, Føroyum, Finnlandi, Íslandi, Noregi og Svøríki, løgd fram. Sambært úrslitinum eru inntøkurnar av bókaútflutningi úr Føroyum samanlagt 25.100 evrur. Heildarupphæddin á virðinum av norðurlendskum bókaútflutningi er 78 milliónir evrur.

Endamálið við kanningini er at fáa eina heildarmynd av virðinum á norðurlendskum bókmentaútflutningi. Statens Kunstfond (Danmark), FILI – Finnish Literature Exchange, Icelandic Literature Center, NORLA – Norwegian Literature Abroad, Swedish Literature Exchange og FarLit – Literature from the Faroe Islands tóku stig til kanningina.

“Tað er av alstórum týdningi at skilja, hvussu bókmentaútflutningur virkar tvørtur um Norðurlond, og hvussu vit áhaldandi kunnu styrkja og menna okkara útflutningsstrategi við støði í hesum innliti,” staðfesta leiðararnir í norðurlendsku bókmentaútflutningsstovnunum.

Í 2024 vóru bruttoinntøkurnar fyri útflutning av føroyskum bókum 25.100 evrur, sum svarar til uml. 190.000 kr. Av hesum vóru 65 % fagrar bókmentir, og 35 % vóru barna- og ungdómsbókmentir.

24 sáttmálar um týðararættindi vegna føroyskar høvundar vóru undirskrivaðir í 2024.

Les alla frágreiðingina