Ukrainski forsetin Volodymyr Zelenskyj vendi sær í dag til tann meiniga russaran eftir ógvusliga rakettálopið á Dnipro í Eysturukraina um vikuskiftið.
Zelenskyj heldur, at vanlig fólk í Russlandi áttu at vent sær ímóti stjórnini og fordømt yvirgangin, sum hon fremur.
- Eg vil fegin siga til øll í Russlandi, og úr Russlandi, sum enn ikki hava fordømt hendan yvirgangin bara við fáum orðum, eisini sjálvt um tey vita og síggja alt...
- Tykkara dirvisloysi og tykkara "latið okkum bíða og vita, hvat hendir" fer bara at hava við sær, at teir somu yvirgangsmenninir ein dag fara at koma eftir tykkum, segði ukrainski forsetin.
- Óndskapur sansar dirvisloysi, og óndskapur minnist tey, sum óttast hann, og sum royna at samráðast við hann. Og tá hann kemur eftir tykkum, fer eingin at verja tykkum, segði Zelenskyj víðari.
Les meira: 29 deyð eftir russiskt rakettálop
Um tú veitst okkurt, sum VP ikki veit - skriva so til vp@vp.fo