Ein føroyingur, sum arbeiddi í Noregi fyrstu tríggjar mánaðirnar í 2024, sleppur ikki undan at rinda arbeiðsmarknaðareftirlønargjald, AMEG, av samlaðu ársinntøkuni.

Maðurin søkti um frítøku fyri alt árið – ella í minsta lagi fyri tíðarskeiðið, hann arbeiddi í Noregi. TAKS sýtti, og Føroya Kærustovnur hevur nú staðfest avgerðina.

Kærustovnurin vísir á, at AMEG-gjaldið verður roknað av samlaðu skattskyldugu ársinntøkuni, og at lógin ikki gevur heimild til at býta árið upp í fleiri tíðarskeið.

Av tí at maðurin búði í Føroyum alt árið og eisini arbeiddi størsta partin av árinum her, varð føroyska lóggávan galdandi.