Ukraina ávarar nú sterkt um, at tað kann fáa álvarsligar avleiðingar fyri Europa, um ES ikki skjótt tekur avgerð um at brúka innifrystu russisku ognirnar.

Tað sigur Iryna Mudra, sum er varaleiðari á skrivstovuni hjá Zelensky, forseta, undan einum toppfundi millum ES-leiðararnar hósdagin og fríggjadagin í Brússel.

- Verður ein avgerð ikki tikin í morgin, so verður tað ein vanlukka fyri hvønn einasta evropeara, sigur Mudra við Kyiv Independent.

Evropeisku leiðararnir hittast áðrenn vikuskiftið, og á skránni eru millum annað innifrystu russisku ognirnar, sum møguliga kunnu brúkast til fíggjarligan stuðul til Ukraina, skrivar norska Dagbladet.