Føroya Kærustovnur hevur staðfest avgerðina hjá eini kommunu um at nokta einum borgara loyvi at seta eitt lýsingarskelti upp. Ætlaða skeltið var bæði ov stórt til víddar og ov høgt uppi sambært reglunum fyri økið.

Men málið snúði seg eisini um, nær umsóknin kom inn.

Borgarin hevði longu í juni 2025 ringt og skrivað til kommununa um møguleikan at seta skeltið upp. Hann helt tí, at málið skuldi viðgerast eftir reglunum, sum vóru galdandi tá, og ikki eftir skeltisreglugerðini, sum varð góðkend í september sama ár.

Hesum tók Kærustovnurin ikki undir við. Samskiftið um summarið varð mett at vera fyrispurningar um reglurnar. Kommunan hevði í august beinleiðis biðið borgaran senda eina umsókn við upplýsingum um stødd, staðseting og slag av skelti.

Tær upplýsingarnar komu sambært Kærustovninum ikki fyrr enn 14. oktober. Tá var nýggja reglugerðin komin í gildi.

Ætlanin var at seta eitt umleið fýra metrar breitt og 1,2 metrar høgt skelti á stykkið. Í bústaðarøkinum var markið tó 0,25 fermetrar til víddar og 0,9 metrar í hædd, mált frá lendinum.

Kærustovnurin metti tí, at skeltið var alt ov stórt, og staðfesti noktanina.