Vinnuhúsið: Mikudagin og hósdagin í hesari vikuni skipar danska verjan fyri DALO Industry Days, har verjan og vinnan hittast í Ballerup í tveir dagar. Tiltakið er liður í ”open for business”-strategiini hjá verjuni, har fyritøkur kunnu hitta innkeyparar og onnur, sum starvast í verjuni.

Eisini føroyskar fyritøkur luttaka á DALO í ár, bæði sum framsýnarar og sum vitjandi. Vinnuhúsið hevur samskipað føroysku luttøkuna, sum fer fram sum partur av básinum hjá Dansk Industri.

Verjan hevur ein breiðan tørv á innkeypi av vørum og tænastum, og tað sæst eisini á teimum luttakandi fyritøkunum, sum koma úr øllum vinnugreinum.

DALO er størsta messa av sínum slag í Norðurlondum, og í sambandi við DALO eru eisini onnur atknýtt tiltøk um tørvin á innkeypi til donsku og evropeisku verjuna komandi árini.

DALO verður hildin á hvørjum ári í august, og var fyrstu ferð á skránni í 2012. Síðani tá er messan vaksin nógv í vavi.

Mynd: Forsvarsministeriet – fmi.dk