Svenska fyritøkan Minesto, sum ger royndir við sjóvarfalsorku í Vestmannasundi, hevur kunngjørt upplýsingarrit, prospekt, fyri treytir v.m. nú felagið ætlar at fáa góðar 150 milliónir svenskar krónur burturúr at útgeva nýggj partabrøv.
Ætlanin er at tekna 82.364.595 nýggj partabrøv til kursin 1,85 SEK fyri partabrævið. Tey sum longu eiga partabrøv fáa tveir tekningsrættir fyri hvørt partabrævið. Fimm tekningsrættir geva rætt til at seta seg fyri einum nýggjum partabrævi. Tíðarskeið fyri tekning er 10. - 24. oktobur 2025.
Pengarnir skulu fyrst og fremst brúkast til ætlanirnar hjá Minesto í Hestfirði.
Prospektið er góðkent av svenska fíggjareftirlitinum.
Um tú veitst okkurt, sum VP ikki veit - skriva so til vp@vp.fo
