Sambært Minesto er hetta met innan vinnugreinina og vísir, at tøknin kann rekast við lutfalsliga lágum viðlíkahaldskostnaði.

Arbeiðið fevndi millum annað um eftirlit við uppstigaða generatorinum, sum hevði verið í rakstri í tíggju vikur, umframt annað viðlíkahald og royndir.

Viðlíkahaldið varð framt í einum tíðarskeiði við lítlari sjóvarfalsorku, soleiðis at framleiðslumissurin varð avmarkaður.

– At vit kunnu fremja umfatandi viðlíkahald og fáa orkuframleiðsluna í gongd aftur eftir bert 48 tímum, er ein avgerandi kappingarfyrimunur við okkara tøkni, sigur Martin Edlund, stjóri í Minesto millum annað í børsfráboðanini.

Hann vísir á, at skipanin ikki krevur stór og kostnaðarmikil serútgjørd skip ella framkomna havnainfrastruktur.

Minesto hevur ment tøknina í Føroyum síðani 2020. Felagið leggur dent á, at samstarvið við føroyska felagið SJH Offshore hevur havt stóran týdning fyri at stytta viðlíkahaldstíðina.

Málið er at gera tøknina búna til størri vinnuligar útbyggingar við fleiri orkueindum.