Eitt kinesiskt felag hevur ment eitt tól, sum við vitlíki og lasaratøkni skal verða eitt alternativ til eitursprey.

Sambært framleiðaranum Photon Matrix Lab tekur tað tólinum 0,003 sekund at finna ein mýggjabita í rúminum. Síðan brennir ein lasarageisli veingirnar, so kyktið dettur niður og doyr.

Eitt myndatól og vitlíki skulu tryggja, at lasarin ikki verður tendraður, tá fólk ella djór eru í vanda fyri at verða rakt.

Tólið hevur fingið stóra umrøðu á sosialum miðlum í Kina, og felagið hevur fingið umleið 5.000 undanbíleggingar. Prísurin er umleið 6.675 krónur.

Sterki lasarin kann tó elva til skaðar á eygu og húð, og tí eru fleiri trygdarkrøv sum skulu lúkast.

Felagið arbeiðir við at fáa tólið sølugóðkent í USA og Evropa.