Felagsskapurin millum Føroyar og Danmark tolir væl avbjóðingar, og tað er avgerðin hjá grein 6 nevndini um WTO-málið, eitt gott dømið um. Ríkisfelagsskapurin fevnir víða, og vit eiga at leggja okkum eftir at varðveita og styrkja ríkisfelagsskapin.

Tað var boðskapurin í røðuni hjá Annu Falkenberg, fólkatingskvinnu hjá Sambandsflokkinum, tá setanarrøðan hjá Mette Frederiksen, forsætisráðfrúu, var til viðgerðar í fólkatinginum.

Anna Falkenberg segði í røðuni, at avgerðin um, at Føroyar kunnu gerast limir í egnum navni í heimshandilsfelagsskapinum, WTO, prógvar, at ríkisfelagsskapurin er rúmligur. Hon ásannar, at sjálvandi eru avbjóðingar í einum felagsskapi, men leggur dent á, at avbjóðingar eisini geva pláss fyri at betra um felagsskapin.

Í røðuni varð eisini víst á, at alt ov fá hava givið tí ans, at allir flokkar, uttan Sambandsflokkurin, eru sinnaðir at taka seg burturúr ríkisfelagsskapinum. Tað verður ikki uttan avleiðingar, um Føroyar velja at taka seg úr felagsskapinum við Danmark, varð sagt í røðuni.

Ríkisfelagsskapurin snýr seg ikki um, at tað eru vit ímóti teimum, men at vit standa saman. Røðan hjá Annu Falkenberg kann lesast her.