Í 1980 búðu umleið 14.000 fólk í Skagen, men í dag er fólkatalið komið niður á umleið 7.250.

Hetta er hent, hóast Skagen er millum kendastu ferðavinnubýirnar í Danmark.

Ferðafólkini koma serliga at uppliva Grenen, har Skagerrak og Kattegat møtast, kendu listamálararnar, strendurnar og sermerkta býarlívið.

Ferðavinnan hevur stóran týdning fyri hotell, matstovur, handlar og mentanartilboð.

Samstundis er Skagen størsta fiskivinnuhavn í Danmark. Í 2025 vórðu umleið 424.000 tons av fiski landað í havnini, við einum samlaðum virði á 1,75 milliardir krónur.

Gongdin í Skagen vísir, at stórt ferðavinnuvirksemi ikki í sjálvum sær tryggjar, at fleiri fólk velja at búseta seg í einum øki.

Ein partur av frágreiðingini er, at nógv hús verða nýtt sum summarhús, samstundis sum yngri fólk flyta úr býnum.

Fólkatalið í Føroyum heldur fram at vaksa
Í Føroyum er gongdin tó ein onnur enn í Skagen. Hóast ferðavinnan eisini er vaksin nógv her á landi, heldur fólkatalið fram at vaksa.

Sambært nýggjastu tølunum frá Hagstovu Føroya búðu 55.640 fólk í Føroyum 1. september 2026. Tað eru 894 fólk fleiri enn somu tíð í fjør, svarandi til ein vøkstur á 1,6 prosent.

Fólkavøksturin er tríggjar ferðir so stórur sum í undanfarna tíðarskeiði, og seinast, fólkatalið vaks so nógv, var fyri seks árum síðani.

Av fólkavøkstrinum stavaðu 699 fólk frá nettoflyting, meðan burðaravlopið, munurin millum fødd og deyð, var 195 fólk.

Men hóast samlaða fólkatalið í Føroyum veksur, er gongdin ymisk kring landið. Meðan serliga Tórshavnar- og Runavíkar kommunur vaksa, minkar fólkatalið í øðrum kommunum.

Gongdin í Skagen er tí ein áminning um, at ein blómandi ferðavinna ikki í sjálvum sær tryggjar fólkavøkstur í øllum økjum.