Umboðsmaðurin hevur viðgjørt eina klagu frá Kringvarpi Føroya um, at Heilsumálaráðið hevði sýtt innlit í ávís skjøl í einum starvsfólkamáli. Talan var um samskiftið við Lønardeildina hjá Fíggjarmálaráðnum og skjøl, sum ráðið metti vera innanhýsis. Umboðsmaðurin var ikki samdur við ráðnum og heitti á ráðið um at umhugsa málið av nýggjum

Ráðið helt, at brævaskiftið við Lønardeildina var undantikið, av tí at Lønardeildin virkaði sum skrivstova hjá ráðnum í starvsfólkarættarligum spurningum, og harumframt at brævaskiftið kundi undantakast sum verandi serkøn ráðgeving.

Umboðsmaðurin var ikki samdur við ráðnum.

Lønardeildin var ikki at rokna sum skrivstova hjá Heilsumálaráðnum í málinum, og undantøka av serkønari ráðgeving er treytað av, at ráðgevingin er til nýtslu í rættarmálum, ella tá støða skal takast til møguligt rættarmál. Ein ítøkilig meting eigur at verða gjørd í hvørjum føri, og hesa meting sá umboðsmaðurin ikki, at ráðið hevði gjørt.

Harumframt vísti umboðsmaðurin á, at eitt skjal varð latið uttanfyristandandi til lestur á slíkan hátt, sum mátti samanberast við avhendan sambært innlitslógini. Verjan av skjalinum varð tí slept.

Umboðsmaðurin var tó samdur við ráðnum í, at upplýsingarnar í skjølunum í stóran mun vóru undantiknar innliti sambært ásetingunum um undantøku av upplýsingum í innlitslógini.

Heitt varð á ráðið um at umhugsa málið av nýggjum og lata umboðsmannin frætta, hvat víðari hendir í málinum. (LUM 26/05438)

Niðurstøðan kann takast niður HER