Miðskeiðisvalið í USA týsdagin kann gera tað munandi truplari hjá Donald Trump at fáa sín politikk samtyktan. Men ein valósigur merkir tó ikki, at forsetin fer at halda seg aftur.

Sambært eini greining í Jyllands-Posten kunnu avmarkaðir møguleikar í innanríkispolitikki fáa Trump at leggja enn størri dent á uttanríkispolitikk, har forsetin hevur víðar heimildir.

Journalisturin og rithøvundurin David Cay Johnston, sum hevur fylgt Donald Trump í áratíggju, og skrivað fleiri bøkur um hann, ávarar um, at forsetin kann gerast enn meira óútrokniligur, verður hann kroystur.

- Sjálvt um Demokratarnir vinna meirilutan í Kongressini, verður torført at leggja bond á amerikanska forsetan – serliga í uttanríkispolitikki, sigur hann.

- Vinna Demokratarnir annað ella bæði kømrini, kunnu teir seta kanningar í verk og royna at avmarka játtanir. Men nógvar uttanríkispolitiskar avgerðir krevja ikki undirtøku frá Kongressini, vísir hann á.

Trump kann eisini brúka forsetaboð og sýta fyri at undirskriva nýggjar lógir. Fyri at seta eitt veto til viks krevst tveir triðingar av atkvøðunum í báðum kømrum.

Evropeiskir leiðarar eiga tí, sambært greiningini, ikki at vænta, at ein demokratiskur sigur á miðvalinum í dag einsamallur broytir kósina hjá Trump mótvegis Putin, Ukraina ella NATO.