Setrið: Hvat merkir tað í veruleikanum, at ein universitetsútbúgving hevur góða góðsku?

Tað snýr seg sjálvandi um góða undirvísing og fakliga sterkt umhvørvi. Men góðska snýr seg eisini um at hava skipaðar mannagongdir, sum tryggja, at útbúgvingarnar verða eftirmettar og mentar, at royndir og sjónarmið hjá lesandi verða tikin við, og at vit regluliga kanna, um útbúgvingarnar framvegis røkka sínum endamáli og tørvinum hjá lesandi og samfelagnum.

Hetta arbeiðið er ein týðandi partur av virkseminum hjá Fróðskaparsetri Føroya.

- Eitt væl skipað góðskuarbeiði og gjøgnumskygd góðskuskipan er fortreyt fyri, at Setrið kann vera við í altjóða útbúgvingarsamstarvi, t.d. Erasmus+. Eisini er tað ein fortreyt fyri, at útlendskir útbúgvingarstovar og arbeiðspláss uttan iva góðkenna eitt prógv frá Setrinum, sigur Martin Tvede Zachariasen, rektari.

Føroyskt universitet – europeiskur standardur
Góðskuarbeiðið á Setrinum tekur støði í teimum meginreglum og standardum, sum eru galdandi fyri hægri útbúgving í European Higher Education Area (EHEA).

Ein týðandi felags karmur eru Standards and Guidelines for Quality Assurance in the European Higher Education Area – vanliga nevndir ESG. Teir lýsa grundleggjandi europeiskar meginreglur fyri góðskutrygging og góðskumenning á universitetum og øðrum hægri lærustovnum.

Hetta merkir millum annað, at góðska ikki er nakað, sum verður kannað eina ferð og síðani løgd til viks. Útbúgvingar skulu fylgjast, eftirmetast og mennast regluliga. Lesandi skulu hava ein virknan leiklut, kunning um útbúgvingarnar skal vera greið og álítandi, og universitetið skal nýta viðkomandi vitan og dátur til at menna sítt virksemi.

Endamálið er bæði at tryggja góðskuna, sum er, og støðugt at menna hana.

Góðska er eisini álit
Fyri tey lesandi merkir hetta, at tað skal vera greitt, hvat tey kunnu vænta av einari útbúgving á Setrinum, og at skipað verður fyri regluligari eftirmeting og menning.

Fyri Setrið merkir tað, at vit skulu kunna vísa á, hvussu vit vita, at útbúgvingarnar hava ta góðsku, sum vit krevja av okkum sjálvum – og hvat vit gera, tá okkurt kann gerast betur.

Og fyri samfelagið merkir tað størri gjøgnumskygni og álit á útbúgvingarnar og prógvini, sum lesandi standa á Setrinum.

Felags europeiskur standardur fyri góðskutrygging er eisini við til at skapa álit millum universitet og útbúgvingarskipanir í Europa. Álitið merkir eisini, at ein góðskuskipan, sum fylgir europeiska leistinum, styrkir flytførið hjá okkara lesandi í Føroyum, soleiðis at tað er lættari at taka staðin skeið við sær tvørtur um landamørk og útbúgvingarstovnar. Somuleiðis verða møguleikarnir fyri víðari lesnaði, eftir at lesandi hava staðið t.d. bachelorprógv frá Setrinum, styrktir, tí Setrið lýkur somu góðskukrøv, som aðrir útbúgvingarstovnar eisini gera. 

Stutt sagt hevur góðskuskipanin stóran týdning fyri Fróðskaparsetur Føroya sum partur av altjóða útbúgvingar- og granskingarumhvørvinum, og fyri Føroyar, sum vilja hava atlimaskap í Erasmus+ og annars gerast partur av Bolognatilgongdini.

Nú er góðskuskipanin savnað á setur.fo
Nýggja góðskusíðan á setur.fo gevur eitt samlað yvirlit yvir góðskuskipanina hjá Fróðskaparsetri Føroya.

Har ber millum annað til at lesa um, hvussu góðskuarbeiðið er skipað, og hvørjar føroyskar og altjóða rammur tað byggir á. Har eru eisini skjøl og skabelónir, sum verða brúkt í innanhýsis góðskutryggingini, umframt dagførd skjøl um útbúgvingarkunning og eftirmetingartilgongdir.

Við at savna og almannakunngera hetta tilfarið verður eisini lættari hjá lesandi, starvsfólki og almenninginum at síggja, hvussu Setrið arbeiðir við góðsku – og hvussu vit arbeiða fyri støðugt at gerast betri.

Les meira um góðskuskipanina á Fróðskaparsetri Føroya HER.