Tað verður dýrari at brúka fleiri kommunalar tænastur í Havn, verður uppskotið til fíggjarætlan fyri 2027 samtykt.
Uppskotið, sum er til aðru viðgerð á býráðsfundinum í dag, leggur upp til hægri brúkaragjøld fyri millum annað matartænastu, reingerð, virkisvenjing og rehabilitering. Hækkingarnar skulu geva kommununi 330.000 krónur eyka um árið.
Eisini gjøldini á kvøldskúlanum, musikkskúlanum og býarbókasavninum skulu hækka. Harumframt verða hægri gjøld fyri parkeringsloyvi og hægri leiga fyri traðir og urtagarðsstykkir.
Størsta eyka inntøkan frá hesum hækkingum kemur tó frá íbindingargjøldum fyri vatn og kloakk. Tey skulu geva tilsamans 2,1 milliónir krónur meira.
Samstundis leggur uppskotið upp til íløgur fyri 325,4 milliónir krónur, íroknað Tórshavnar Havn. Av hesum fara 156 milliónir til røktarheimið á Stórubrekku, sum væntast liðugt tíðliga í 2028.
Aðrar stórar íløgur eru 21 millión til Argja skúla, 20 milliónir til orku- og umhvørvisátøk og 18 milliónir til kloakkir og spillvatn.
Um tú veitst okkurt, sum VP ikki veit - skriva so til vp@vp.fo



