Ethel Caterham úr Onglandi fylti fríggjadagin 117 ár og hátíðarhelt dagin saman við familju og vinum á røktarheiminum í Surrey, har hon býr.

Caterham gjørdist heimsins elsta livandi menniskja í apríl 2025, eftir at brasilska nunnan Inah Canabarro Lucas doyði 116 ára gomul.

Hon varð fødd trý ár undan Titanic-vanlukkuni og hevur upplivað báðar heimsbardagar. Í 2020 fekk hon eisini koronu, tá hon var 110 ára gomul.

Ethel var tann næstyngsta av átta systkjum. Í 1927 fór hon til India, har hon arbeiddi sum au pair hjá einari bretskari herfamilju. Seinni giftist hon Norman Caterham, oberstloytnanti, og tey búðu eina tíð í Hong Kong, har hon stovnaði ein barnagarð.

Bæði døtur hennara og maðurin doyðu áðrenn hana.

Ethel koyrdi bil heilt til hon var 97 ára gomul. Í fjør vitjaði Charles kongur hana, stutt eftir at hon fylti 116 ár.

Heimsmetið sum elsta menniskja nakrantíð eigur tó framvegis franska Jeanne Calment, sum doyði í 1997, 122 ár og 164 dagar gomul.