Russland kann leypa á í morgin sum ein annan dag.

Russland heldur áfram at fyrireika seg til kríggj við Nato, tað er ongin ivi um tað, sigur týski herovastin, Alexander Solfrank við Reuters. Hann vísir millum annað á, at Russland eftir hansara tykki brúkar áhaldandi álopini á Ukraina til at venja og fyrireika seg til eitt størri stríð við Nato, vísir týski herovastin á.

- Kemur eitt álop úr Russlandi á eitt Natoland, so verður tað nokk eitt minni álop fyri at vita hvussu Nato reagerar. Tað álopið er so mest sannlíkt ein byrjan uppá eitt størri álop sum kemur seinni.

Samstundis sum orðini hjá týska herovastanum falla ber til at staðfesta, at fleiri Nato lond økja um tilbúgvingina og leggja ætlanir um, hvussu eitt møguligt russiskt álop skal svarast, og hvussu verjan av Eysturevropa skal skipast næstu árini.