Í dag ynskja vit Árna Dahl hjartaliga til lukku við 80 ára degnum, skrivar Landsbókasavnið.

Árni Dahl er rithøvundur, týðari og eigur saman við konuni Marionnu Debes Dahl forlagið Fannir. Árni fekk í 1996 virðisløn M.A. Jacobsens fyri mentanaravrik og Heiðursgávu Landsins í 2014. Millum mongu útgávurnar Árni hevur skrivað og lagt til rættis kunnu nevnast Bókmentasøga I-III og Søga og stev 1-6.

Síðan 2010 hevur forlagið Fannir givið út røðina Leikrit, í røðini eru 35 leikrit. Ætlanin við røðini var at prenta teir leikir, sum eru settir á pall og sum fyrr eru prentaðir, annaðhvørt í bóklingum, tíðarritum og í føroyskum dagbløðum. Tíðarmarkið uppeftir varð sett til 1949. Seinasta leikritið í røðini kom út í 2024.

Í samband við føðingardagin hava vit sett nakrar av bókunum Árni antin hevur skrivað ella lagt til rættis fram í útláninum.