Íslendska Hampiðjan-samtakið, sum eigur føroysku Vónina, ætlar at flyta meginpartin av framleiðsluni av aliútgerð til India í 2027. Orsøkin er, at bæði lønar- og framleiðslukostnaðurin er munandi lægri har enn í Evropa.
Hetta kemur fram í nýggja níggju mánaða roknskapinum hjá Hampiðjan, sum varð kunngjørdur hóskvøldið.
Samtakið byggir tvær stórar verksmiðjuhallir í Auric-ídnaðarøkinum í India. Hvør teirra er 28.000 fermetrar.
Í aðrari høllini skulu knútaleys alinet og liðugir aliringar framleiðast til Eldi, sum er altjóða alivinnuparturin hjá Hampiðjan.
Hin høllin skal yvirtaka framleiðslu av netagørnum og nótum, sum í dag fer fram í Litava.
Hampiðjan væntar, at umleið 750 fólk fara at arbeiða á nýggja ídnaðarøkinum.
Felagið sigur, at fíggjarligu fyrimunirnir av flytingini fara at síggjast næsta ár men fáa fullan virknað í 2028.
Hampiðjan sigur, at framleiðsluorka framvegis skal varðveitast í Evropa fyri at kunna veita útgerð við stuttari freist.
Tað verður ikki upplýst í roknskapinum, um flytingin til India fær avleiðingar fyri virksemið í Føroyum.
Hampiðjan hevði fyrstu níggju mánaðirnar í ár ein umsetning upp á 268 milliónir evrur, sum er 3,5 prosent minni enn í fjør. Yvirskotið eftir skatt var 10 milliónir evrur, samanborið við 8,5 milliónir árið fyri.
Um tú veitst okkurt, sum VP ikki veit - skriva so til vp@vp.fo



