Fleiri enn 100 mótmælisfólk hava trokað seg inn á byggiplássið hjá Microsoft í Amsterdam, har eitt dátumiðstøð verður bygt, skrivar DR við Reuters sum keldu.

Summi eru farin upp í ein krana og upp á takið. Sambært niðurlendska miðlinum NOS hava samanbrestir verið við løgregluna.

Mótmælisfólkini finnast at umhvørvisárinunum av dátumiðstøðum og sambondunum hjá Microsoft við ísraelska herin.

Microsoft sigur seg virða rættin at mótmæla, men ikki lógarbrot ella at fólk verða sett í vanda.

Mótmælið er partur av einum altjóða átaki. Í morgin verða eisini mótmæli í Danmark.