Ronnie er aktuellur við nýggja lagnum “90’ini (Níti barn)”, sum er ein persónlig og sjálvironisk frásøgn um at vaksa upp í hálvfemsunum, vera komin upp um tey fjøruti og kenna ein longsul eftir eini farnari tíð.

Sangurin byggir á minnir frá barnaárunum, á kærleikan til hiphop og rapp og á kensluna av at vera eitt níti barn. Við einum lættum og óhátíðarligum hugburði tekur Ronnie stigið inn í ein tónleikaheim, hann sjálvur ikki vanliga verður settur í samband við.

- Eg eri als ikki nakar rappari, men havi altíð havt hug at royna tað. Hetta lagið er ein leikandi og óhátíðarlig roynd at gera júst tað, sigur Ronnie.