Fyrst skulu tingfólk atkvøða um at taka trý mál úr aftur nevnd. Tey snúgva seg um at hækka hámarkið fyri sjúkradagpening, broyta skattalógina og hækka mørkini fyri familjuískoyti. Møgulig onnur viðgerð av hesum málunum er eisini á skránni.
Skattauppskotið fevnir millum annað um hægri samdøgursfrádrátt, at steðga stigvísu minkingini av uttanlandsfrádráttinum og frádrátt fyri fakfelagsgjald.
Eisini skal uppskotið um at hækka inntøkumarkið, áðrenn mótroknað verður í lestrarstuðlinum, hava aðru viðgerð. Tað sama skulu uppskotini um stutttíðarleigu av bústøðum og yvirtøku av landslæknaembætinum.
Tvær fyrstu viðgerðir eru á skránni. Onnur snýr seg um broytingar á dagstovnaøkinum, millum annað býtið millum land og kommunu, aldursbólkar og námsfrøðiliga ráðgeving. Hin snýr seg um at seta á stovn eitt tilboð um grundútbúgving innan tilbúgving.
Harumframt viðger tingið tilráðingar og frágreiðingar um virksemið hjá Útnorðurráðnum og Norðurlandaráðnum.
Tingfundurin byrjaði klokkan 11.
Um tú veitst okkurt, sum VP ikki veit - skriva so til vp@vp.fo



