Eitt óvanliga opið stríð er íkomið í Skotlandi millum stjórnina og almenna felagið Caledonian Maritime Assets Limited (CMAL), sum hevur ábyrgd av ferjuíløgum.
Skotska stjórnin ætlar at lata skipasmiðjuna Ferguson Marine byggja nýggjar ferjur, sum skulu sigla til skotsku oyggjarnar, uttan vanliga útbjóðing.
Men stjórin í CMAL, Kevin Hobbs, segði mikudagin við eina tingnevnd, at felagið beinleiðis hevur ávarað stjórnina ímóti ætlanini.
Orsøkin er, at skipasmiðjan áður hevur havt stórar seinkingar og kostnaðarhækkingar. CMAL óttast, at hetta aftur fer at ganga út yvir oyggjabúgvarnar.
Skotska stjórnin heldur tó fast við, at tað er umráðandi at varðveita skipasmiðjuna og arbeiðsplássini.
Um tú veitst okkurt, sum VP ikki veit - skriva so til vp@vp.fo



