Ringasta marran hjá Ukraina og sanniliga eisini Europa tykist at blíva veruleiki, í øllum førum um USA fær sín vilja.

Uppskotið um frið, sum USA hevur lagt fyri Ukraina, gevur Russlandi stór ukrainsk landaøki, tað verður onki krav um endurgjald ella ákærur um krígsbrotsverk og Russland skal í heila tikið inn aftur í hitan og samstarva og -handla, ikki minst við USA. Tað verður ongin Nato limaskapur og onkir Nato hermenn í Ukraina at tryggja friðin, og ukrainski herurin skal minka nógv. Og Ukraina hevur eina lítla viku til at góðtaka alt. Annars fer USA at sløkkja fyri amerikansku vápnunum, sum Ukraina í dag brúkar í krígnum ímóti Russlandi.

- Hetta er at geva Russlandi løn fyri sínar aggressiónir, í øllum førum sæð úr einum ukrainskum sjónarhorni, sigur Steffen Gram, sum er aljóða korrespondentur hjá Danmarks Radio.